Filesofie in 't plat #1: Wie de "warre wereld" eindelijk tot fabel gewoore is

In dis rubriek vertaal ich 'n filesofische passaag dae ich sjwan ving nao mien moojertaal, 't Limbörgs. Vandaag ein van Nietzsche's meis iconische sjriefsels, "Wie die "wahre Welt" endlich zur Fabel wurde", euver 't eind van de metafysica.

Wie de "warre wereld" eindelik 'n fabel is gewoore.

door Friedrich Nietzsche, oet Götzen-Dämmerung, oder Wie man mit dem Hammer philosophiert

1. De warre wereld, beriekbaar veur de wieze, de vrome, de deugdelikke, - heer leef in dae wereld, heer is dae wereld.

(De ajdste väörrem van 't idee, redelik sjlöm, mäkkelik, euvertuigend. 'ne Ömkjerring van de zin, "ich, Plato, bin de warheit")

2. De warre wereld, onbereikbaar veur noe, mèr belaof aan de wieze, de vrome, de deugdelikke (veur de zönner, dae boete deit)

(Veurtgang van 't idee, ze wört subtieler, verraojerlikker, onbegriepelikker - ze wört vroumisj, ze wört Christelik…)

3. De warre wereld, onberiekbaar, onbewiesbaar, onbelaofbaar, mèr es gedachte 'n trwas, 'n verplichting, 'n imperatief.

(In de kern de ouwe zon, mèr door nevel en scepsis gezeen; 't idee is subliem gewoore, bleik, noors, Königsbergsj.)

4. De warre wereld - onberiekbaar? In eeder geval, onberiek. En es onberiek aoch onbekind. Daoröm aoch neet trwastend, verlossend, verplichtend; wa kin os get onbekinds toe verplichte?

(Grieze mörrige. De jerste gaapsj van de reije. 't Haonegekräj van 't positivisme)

5. De warre wereld - 'n idee, dat nörges mje good veur is, neet ins mje verplichtend - 'n nutteloos, 'n euverboojig gewoore idee, en dus: 'n weerlègk idee. V'r sjaffe häör aaf!

(Heldere daag, ontbiet, terrukkjer van de bon sens en de blieheit, Plato's sjaamrwad, duvels lewäj van alle vrieje geiste)

6. De warre wereld höbbe v'r aafgesjaf: welke wereld blief euver? De sjienbare wellich? … Mèr nei! Mit de warre wereld höbbe v'r aoch de sjienbare aafgesjaf!

(Middig, aogenblik van de kortste sjaem, einde van de langste fout, wagtepunt van de minsjheit: INCIPIT ZARATHUSTRA.)